Təhsilin keyfiyyəti müəllimin yaradıcı əməyindən asılıdır

Şahrza Ağayev,

Azərbaycan Dövlət Pedaqoji Universitetinin dosenti,

pedaqogika üzrə fəlsəfə doktoru, qabaqcıl təhsil işçisi.

XIX əsrdə Almaniyanın “Die Neue zelf” jurnalında dərc olunmuş bir məqalədə deyilirdi ki, “siyasi iqtisadçılar qeyd edirlər ki, əmək hər cür sərvətin mənbəyidir”. Əməyin insan həyatının birinci əsas şərti olması isə həmişə vurğulanır. Əmək təbiətlə insan arasında baş verən məqsədyönlü bir proses olub cəmiyyətin zəruri tələbatları ilə şərtlənərək, özündə mühüm səciyyəvi cəhətləri ehtiva edir. Buraya, ilk növbədə məqsədəuyğun fəaliyyət, ictimai və yaradıcı xarakter, əmək alətlərinin yaradılması prosesi də daxil edilir. Tədqiqatçılar fəlsəfi müddəalara əsaslanaraq əməyin instinktiv və şüurlu formalarından ibarət olduğu fikirlərini də irəli sürürlər. Alimlərin qənaətinə görə, əmək, cəmiyyət və dil arasında qarşılıqlı qırılmaz münasibətlər vardır. Əmək prosesi nəticəsində cəmiyyət yaranmışdır. Əmək prosesində yaranan qarşılıqlı ünsiyyət saxlamaq ehtiyacı dilin yaranmasını zəruri etmişdir. İnsanın tərbiyəsində əmək ona görə həlledicidir ki, o, insanın məqsədyönlü fəaliyyəti olub istehsalın ayrı-ayrı fazaları - istehsal, bölgü, mübadilə və istehlakla bilavasitə əlaqədardır. Ona görə də əməyə iqtisadi kateqoriya olmaqla pedaqoji prosesdə şəxsiyyətin formalaşmasında mühüm vasitə kimi baxılır. İnsanın əmək qabiliyyəti, enerjisi onun tərbiyəsi ilə sıx bağlıdır. Bu mənada təlim əməyi prosesində öyrənənin istifadə etdiyi maddi (fiziki əmək) və qeyri-maddi (əqli əmək) qüvvə onun məqsədyönlü fəaliyyətini təmin edir. Müasir dövrdə ümumtəhsil məktəblərində texnologiya fənninin tədris olunması, ilk növbədə şagirdlərdə texnologiya mədəniyyəti, texnoloji bilik və bacarıqlarının inkişaf etdirilməsi, öz fəaliyyətlərində onlardan məqsədyönlü istifadə edə bilmələri zəruriyyətindən irəli gəlir və onlarda həyati bacarıqların formalaşdırılması baxımından böyük əhəmiyyət daşıyır (3.səh.53).

Təbiidir ki, təhsilin keyfiyyəti müəllimin yaradıcı əməyindən, öyrənənlərin mənəvi, intellektual və estetik inkişafının, dövrə uyğun texnoloji bacarıqlar əldə etməklə sosial-iqtisadi uyğunlaşmalarına zəmin yaradılması da əmək tərbiyəsindən başlayır. “Azərbaycan Respublikasında təhsil insan hüquqları haqqında beynəlxalq konvensiyalara və Azərbaycan Respublikasının tərəfdar çıxdığı digər beynəlxalq müqavilələrə əsaslanır, təhsil sahəsində milli-mənəvi və ümumbəşəri dəyərlərin prioritetliyi əsasında dünya təhsil sisteminə inteqrasiya olunaraq inkişaf edir.” Təhsil haqqında qanunda qeyd olunan konseptual ideyalara müvafiq şəkildə təhsilin keyfiyyətini müasir tələblər səviyyəsinə qaldırmağa nail olmaq üçün, ölkədə sistemli olaraq məqsədyönlü və planlı işlər həyata keçirilir. Bəşəriyyətin əldə etdiyi elmi-texniki və əxlaqi dəyərlərə yiyələnmə, öyrənənlərdə təlim əməyinə maraq yaratmaq, onların bir vətəndaş kimi yetişməsində mühüm amillərdəndir. Bu işdə müasir təhsilin imkanları daha genişdir. Araşdırmalardan aydın olur ki, təhsilə marağın artırılması üçün müəllim tədris materiallarının məzmununu konkretləşdirməyi bacarmaqda və dünyada aparılan pedaqoji tədqiqatlarla inteqrasiyada peşəkarlıq göstərməlidir. Öyrənənlərdə təlim əməyinə maraq yaratmaq problemin həlli, müəllimin yaradıcı potensialından, peşəkarlıq səviyyəsindən, təlimin formalarından, yeni pedaqoji texnologiyalarının tətbiqindən, öz üzərində daim işləməsindən, təfəkkürlü və humanist yönümlü insan olmasından, funksional olaraq bağlıdır. Davranışları yönləndirən ilk faktor daxili-təbii maraq, digəri isə xarici-mükafat motivasiyalardır.
Kanadanın Quebec əyalətindəki Laval Universitetinin motivasiya üzrə mütəxəssisi professor Frederic Guay deyir ki, "Daxili motivasiya çox erkən yaşlarda özünü büruzə verir. Uşaqlar proaktivdirlər, hər şeyə maraq göstərmələri təbiətlərindən irəli gəlir. Müəllimlər və təhsil sistemi bunu təşviq etməlidirlər". Aktuallığına görə,bu barədə dünyada və ölkəmizdə pedaqoq- alimlər tərəfindən fundamental tədqiqatlar bütün dövrlərdə aparılmışdır.Dünyasını dəyişənləri Allah rəhmət eləsin,səmərəli fəaliyyətdə olanlara can sağlığı arzu edirik. Təhsil sahəsində ölkədə aparılan bütün islahatların məqsədi tədris əməyinə maraq yaratmaqla onun keyfiyyətinin yüksəldilməsinə nail olmaqdır. Bu məqsədlə,yaradıcı əməyilə diqqəti cəlbedən, peşəkarlığı və pedaqoji səriştəliliyi ilə nüfuz qazanan professorlardan F.Sadıqov, L.Qasımova, F.Rüstəmov, A.Abbasov, M.Həsənov, P.Əliyev, M.İlyasov, H.Əlizadə, İ.Cəbrayılov, H.Əhmədov kimi alimlərin metodoloji mahiyyət daşıyan dərslik və monoqrafiyalarda təhsilin keyfiyyətinin standartlara uyğunluğu,nəzəri və praktik baxımdan tədqiq olunmuşdur. Müəllimin öyrənənlərdə təlim əməyinə maraq yaratmaq, pedaqoji prosesdə motivasiyaya yönələn peşəkarlıq və səriştəlilik fəaliyyəti, şəxsi keyfiyyətinin mühüm əhəmiyyət kəsb etməsi, düzlük, doğruçuluq, zəhmətsevərlik, işgüzarlıq və mənəvi saflıq tərbiyəsi məsələləri barədə, adları qeyd etdiyimiz humanist alimlərin aşağıdakı fikirlərinə istinad etməyi əhəmiyyətli olduğunu hesab edirik:

F.Sadıqov - “Müstəqillik qazandığımız hazırkı şəraitdə müəllim və alimlərə verilən yüksək qiymət onların yaradıcılığındakı örnək nümunələrlə ölçülür. Azərbaycan Respublikasının Prezidenti möhtərəm İlham Əliyev cənablarının imzası ilə təsdiq olunan "Azərbaycan Respublikasında təhsilin inkişafı üzrə Dövlət Strategiyası"nda şəxsiyyətyönümlü təhsilin məzmununun yaradılması ölkəmizin bütün müəllimləri qarşısında təxirəsalınmaz vəzifələr qoymuşdur. Çünki strategiyada əsas istiqamətlərdən biri olan şəxsiyyətyönümlü təhsilin məzmununun yaradılması hər müəllimə şamil edilə bilməz. O müəllimə şamil edilə bilər ki, həmin müəllim, ilk növbədə, səriştəsi, savadı, nəzəri və praktik hazırlığı ilə şəxsiyyətyönümlü təhsilin yeni məzmununun yaradılmasında öndə getmiş olsun”.

L.Qasımova- “Unutmamalıyıq ki, bizim özümüzün artıq didaktika sahəsində tədqiqat əsərləri olan Nurəddin Kazımov kimi, xalq pedaqogikası sahəsində müqtədir əsərlərin müəllifi olan Əliheydər Həşimov kimi, pedaqogika tarixi sahəsində ciddi tədqiqatları olan Fərrux Rüstəmov kimi, estetik tərbiyə sahəsində fərqli tədqiqatları ilə gündəmə gələn Vidadi Xəlilov kimi, musiqi sahəsində çox maraqlı əsərlərin müəllifi olan Oqtay Rəcəbov kimi mütəxəssislərimiz var. Bunların sırasında əmək tərbiyəsi, əmək təlimi, peşə təhsili, peşəyönümü problemləri üzrə bənzərsiz tədqiqatlar aparan və sanballı əsərləri ilə diqqəti cəlb edən Şahrza Ağayevi də qeyd etmək lazımdır”.

F.Rüstəmov - “Düzlük təmiz adamın, təmənnasız və xeyirxah adamın yaraşığıdır. Danışanda dilinin altına şəkər qoyar, nə əli, nədə dili ilə heç kimi incitməz. Öz incikliyini elə ustalıqla çatdırar ki, tərəfmüqabili inciməsə də, yaxşıca dərs alar. Doğrudan da, xoşxasiyyətli insanın dostu çox, ömrü uzun olar. İstedad, zəhmət və xoşxasiyyət insanın həyat uğurunun təməlini təşkil edir. Allaha bağlı olanın ruhu rahatdır, sakitdir, ona görə də səbirli, təmkinli və təqvalıdır. Könlü və gözü tox, böyük günahlardan uzaq adam, Allahın verdiyinə - azına, çoxuna, acısına, şirininə şükür edəndir”.

A.Abbasov - “Dahi Nizami Gəncəvi “Sirlər xəzinəsi” poemasında kərpic kəsən bir qocanın başına gələn bir əhvalatı təsvir edir. Bu rəvayətdən hamımızın xəbəri var. Belə ki, bir cavan oğlan qan-tər içərisində torpaqdan kərpic kəsən qocaya yaxınlaşaraq onun halına acıdığını bildirir:

Torpağın qalxanına qılınc vurma bu qәdәr,

Qalx ki, sәndәn bir qarın çörәk әsirgәmәzlәr.

Halal zəhmətin nə olduğunu bilməyən harın oğlanın kinayəli sözləri qocaya təsir edir. Üzünü ona tutaraq:

Onunçün öyrәtdim ki, әlimi bu sәnәtә,

Bir gün sәnә әl açıb düşmәyim xәcalәtә.

Deyiləm һeç kәsә xәznədәn ötrü möһtac,

Әlimin zәһmәtiylә toxdur gözüm, deyil ac.

Aqil qoca bu sözləri ilə cavan oğlana dərs verir. Oğlan dediyi sözlərdən xəcalət çəkib yoluna düzəlir.

Bu əhvalatı təsadüfi olaraq yada salmadım. İnsan əməkdən, halal zəhmətdən kənarda qala bilməz. Əməklə ülfət bağlayanlar, zəhmətə qatlaşanlar həm maddi, həm də mənəvi baxımdan zənginləşir: fiziki əmək sahibləri də, zehni əmək sahibləri də”.

M.Həsənov- “Pedaqoji fikir tarixində əmək tərbiyəsi, əmək təlimi, peşəyönümü, peşə oryentasiyası, uşaqların peşəyə hazırlanması, məktəbəqədər uşaqlarla və ibtidai sinif şagirdləri ilə aparılan əmək tərbiyəsi işləri ilə bağlı ciddi tədqiqatlar aparan elm adamları olmuşdur. Mən onların demək olar ki, hamısının pedaqoji fikir tariximizdəki yeri, rolu və əhəmiyyəti ilə bağlı tədqiqatlar aparmış və apardığım tədqiqatların demək olar ki, böyük əksəriyyəti nəşr olunaraq pedaqoji ictimaiyyətin istifadəsinə təqdim olunmuşdur.”

P.Əliyev- “Uşaqların əməyə hazırlanması ilə bağlı əsərlər, elmi məqalələr yetişən nəslin nümayəndələrinə əməyin həm nəzəri, həm də praktik əsasları ilə əlaqədar bilik, bacarıq və vərdişlər sisteminin aşılanması mühüm əhəmiyyət kəsb edir”.

M.İlyasov-“ Söhbət işgüzar alimlərdən düşəndə bir çox hallarda gecəsini gündüzünə qatıb apardıqları elmi tədqiqatları məqalələrə, metodik tövsiyələrə, kitabçalara, kitablara, monoqrafiyalara, dərsliklərə, dərs vəsaitlərinə və bir sıra sanballı əsərlərə çevirən alimlər nəzərdə tutulur. Əlbəttə ki, belə yanaşma nümunəvi yanaşma kimi qəbul edilə bilər. Açığını etiraf edək ki, bu gün elmi tədqiqata istiqamət alanların bir qismi öz səriştələrinə uyğun tədqiqat sahələri seçməkdə çətinlik çəkirlər.”

H.Əlizadə- “Əsrarəngiz gözəllikləri, təbii sərvətləri, mülayim iqlimi, göz oxşayan dağları, meşələri, çayları, bərəkətli torpağı ilə fərqlənən ölkəmiz öz insanları ilə də həmişə fəxr etmişdir. Təbii ki, belə gözəl coğrafi mühitdə intellektli, vətənpərvər, alicənab, xeyirxah, zəhmətkeş, mərd, humanist, insansevər, əliaçıq, ürəyiyumşaq, çörəkverən, ailəcanlı, böyük-kiçiyə, qadına, uşağa hörmət və ehtiram bəsləyən insanlar yetişə bilər. Asəf Zeynallının Cəfər Cabbarlının "Sevimli ölkəm" şeirinə bəstələdiyi “Ölkəm” romansı dahi sənətkar Bülbülün ifasında necədə əzəmətlə səslənir. İnsanın arzuları, bitib-tükənməyən arzuları, heç kim bilmir ki, nə vaxt yaranır, niyə yaranır. Əziz oxucum, bu hissləri mən də yaşamışam, ibtidai sinifdə mənə dərs demiş, nurani görkəmli, həlim, gülərüz, mehriban insan olan Kubra müəllimi bu gün də gözümün önünə gətirir, qarşısında baş əyir, böyük Allahdan ona rəhmət diləyirəm. Yadıma dünya dahilərindən birinin dediyi “Valideynlərim məni dünyaya gətirib, müəllimlərin isə dünyanı dərk etməyi mənə öyrədib?” kəlam düşür. Mən xoşbəxt insanam ki, mənim valideynlərim həm də mənim müəllimlərim olub”.

İ.Cəbrayılov- “Hər bir insanın özünəməxsus ömür yolu olur.Bu ömür yolu o zaman şərəfli sayılır ki, insan ali məqsədlər uğrunda mübarizə aparsın, xalqa, cəmiyyətə, vətənə xidməti özü üçün başlıca məram seçsin.Belə insanlar iş yerində, insanlar arasında, cəmiyyətdə hörmət-izzət sahibi olur, şəxsiyyət səviyyəsinə yüksəlirlər. İnsan hansı yaşda olursa olsun, onun arzu və istəkləri bitib-tükənmir. Bu o deməkdir ki, insan hər zaman sabaha daha böyük ümidlə, inamla baxır. Bu arzu və istəklər insanı yaşamaq, yaratmaq uğrunda mübarizəyə, cəmiyyətə, vətənə daha çox fayda vermək missiyasını yerinə yetirməyə səsləyir.”

H.Əhmədov - “Ölkə daxilində və xaricdə nüfuzlu jurnallarda çap olunan məqalələrində, elmi konfrans materiallarında və metodik vəsaitlərdə imzasına tez-tez rast gəlmək, .... uzun illər elmi-pedaqoji əməkdaşlıq etdiyimə görə zəhmətsevərliyi, tədqiqatçılıq qabiliyyəti, pedaqoji proses üçün aktual sahə olan əmək hazırlığı probleminin nəzəri və praktik məsələləri barədə yazmış olduğu əsərləri həmişə diqqətimi cəlb etmişdir.”(1).

Mövzu ilə bağlı problemin həllinə yönələn elmi tövsiyələr, insan şəxsiyyətinin ahəngdar inkişafının başlıca səbəb və nəticələri reallıqla,təbii boyalarla şərh olunur. Ulu öndər Heydər Əliyevin “Azərbaycan müəllimləri ən yüksək mənəviyyata, vətəndaşlıq hisslərinə malik olan insanlardır”müdrik kəlamı alimlərimizin simasında bir daha aydın sübut olunur.

Müasir təhsilin keyfiyyəti öyrənənlərdə tədris əməyinə daxili və xarici maraq yaratmaqla qazanılan əsas göstərici təlim nəticələridir. Şagirdin hər hansı fəndən müəyyən mövzu, bölmə və ya tam kurs üzrə bilik və bacarıqlarının nailiyyət səviyyəsi onun göstərdiyi təlim nəticələrinin uyğun qiymətləndirmə standartları ilə müqayisə olunması ilə müəyyənləşdirilir. Təhsilin keyfiyyəti üçün öyrənənlərdə təlim əməyinə maraq yaratmaq müasir dərsdə həllini tapır. Hər bir dərs didaktik məqsədlər kompleksini yerinə yetirir və bu zaman müxtəlif üsullardan istifadə olunur. Müasir müəllim yeni təlim texnologiyalarına dərindən bələd olmalıdır. Ənənəvi dərsdə təlim müəllim-dərslik-şagird formulu ilə qurulurdusa, müasir dərsdə şagird-dərslik-müəllim ardıcıllığı əsas götürülür. Müasir dərsdə şagirdlərin hərtərəfli inkişafı təmin edilir;gözlənilən nəticə, əsasən alınır;şəxsiyyətyönümlü olur; inkişafetdiricilik başlıca meyar kimi nəzərdə tutulur. Bununla əlaqədar prosesi araşdıran prof. M.İlyasov məsələnin mahiyyətinə aydınlıq gətirməyə çalışarkən inandırıcılıqla, belə təhlil edir:”Təlim həmişə fəallığa əsaslanmışdır. O, qeyri-fəal ola bilməz. Əgər dərsdə sual-cavab, axtarıb-tapma, düşünmək, fikirləşmək, fəaliyyətə qoşulma, nəticə çıxarma vardırsa, deməli fəallıq da vardır. Bunlar yoxdursa onu heç təlim adlandırmaq düzgün deyildir. Təlim prosesdir və bu proses məhz müəllim və şagirdlərin fəallığına əsaslanır. Tərəflərdən heç olmazsa birinin fəallığı yoxdursa burada təlimdən söhbət gedə bilməz. Buna görə də “fəal təlim” istilahında olan “interaktivlik”, yəni daxili fəallıq “ənənəvi” adlandırdığımız dərslərdə də vardır. Dərsdə şagirdlərin təfəkkürünün fəallığına nail olmaq həmişə əsas məqsəd olmuşdur və bu gün də başlıca məqsəd olaraq qalır. İnteraktiv təlimə üstünlük verənlərin əsas kimi dəyərləndirdikləri daxili fəallığa nail olmaq, yəni öyrənənlərin təfəkkürünün inkişaf etdirilməsi tələbi həmişə olmuş və yəqin ki, həmişə də olacaqdır. Lakin ”ənənəvi” adlandırdığımız dərslərdə “quru didaktikizm”, elmiliyə daha çox diqqət ayrılması, motivasiyanın yaradılmaması, frontallıq, emosionallığın zəifliyi, tədqiqatçılığa, fikir müstəqilliyinə yer verilməməsi kimi faktorlar bu tələbin bu günki müstəvidə reallaşmasına imkan verməmişdir. İnteraktiv təlim metodlarından istifadə probleminin hazırda gündəmə gətirilməsi təfəkkürün inkişaf etdirilməsi probleminə bir növ təkan verdi ki, bunu da alqışlamaq lazımdır. Fikrimizcə burada əsas məsələ bu problemin çalarlarının ənənəvi dərslərdə də olması deyil, hazırda təlim prosesində buna müəllimlərin hansı səviyyədə nail ola bildiklərindən ibarətdir.Bunun üzərində dayanmağı lazım bilirik. Təlim və tərbiyənin əsas təşkili forması olan dərs məktəbin bütün fəaliyyətinin mərkəzində dayanır. O, bütün pedaqoji prosesi zəncir kimi bir-birinə bağlayaraq müəllimin yaradıcılığının başlıca aləti kimi özünü göstərir”.(2. səh.54).

Əlli illik elmi pedaqoji fəaliyyətim dövründə daim öyrənmək və öyrətmək prinsipinə sadiq olmuşam. Arzu edərdim ki, ənənə və müasirlik ifadələrinin bir-biri ilə necə fərqləndiyini hər bir müəllim obyektiv dəyərləndirməyə nail olsun. Müəllimin peşəkarlığı və səriştəliliyi bütün dövrlərdə aktual olmuşdur. Təhsilin keyfiyyətinin öyrənənlərdə tədris əməyinə maraq yaratmaqdan asılılığı kimi problemlərin həlli qeyri xətti olub müəllimin peşəkarlığı və səriştəliliyi ilə şərtlənir. Bu barədə müxtəlif məzmunda elmi materiallar ölkə daxilində və xaricdə çap olunmuşdur. Milli və bəşəriliklə prof. M. İlyasov “Peşəkar və səriştəli müəllimin digər müəllimdən fərqli və üstün cəhətləri nədən ibarət ola bilər?” sualına uzun illərin elmi-pedaqoji təcrübəsinə əsasən nəzəri və praktik olaraq alqoritmik cavablandırması bir oxucu kimi məndə daxili maraq yaratdı: “Peşəkar və səriştəli müəllim bütün varlığı ilə öz peşəsinə bağlanan, işini sevən, tədris etdiyi fənnini dərindən və hərtərəfli bilən mütəxəssisdir. Onu başqa müəllimlərdən fərqləndirən başlıca cəhət də budur. Fənnini gözəl bilir və yaxşı da öyrədir. Pedaqoji yeniliklərdən xəbərdardır və yeni pedaqoji təfəkkürə malikdir.Özünə qarşı tələbkardır və öyrənməyə özündə həmişə ehtiyac hiss edir; Peşəkar və səriştəli müəllim pedaqoji hadisə və proseslərə səriştəliliklə yanaşır, mürəkkəb pedaqoji problemləri ustalıqla həll edir. İstər təlim, istərsə də tərbiyə prosesində meydana çıxan problemlərin həllində fərqli və daha düzgün qərarlar qəbul edir, operativ metodlardan istifadə etməklə onu həll edir; Peşəkar və səriştəli müəllimlər daim yeniliklər axtarması,yeniliyə meylliyi, pedaqoji prosesə yaradıcı yanaşmaları, mövcud pedaqogikanın müəyyənləşdirdiyi müasir yanaşma tərzlərindən məharətlə istifadə etmələri ilə seçilən müəllimlərdir ki, onların tədris etdikləri dərslər və apardıqları tədbirlər də özünün orijinallığı ilə seçilir. Daim yeniliklər axtarışında olmaq, standart hallarda müəyyən yeniliklər etməyi bacarmaq müəllim peşəkarlığında mühüm yer tutur. Təcrübə göstərir ki, müəllim peşəkarlığı yüksək olduqda o, bu peşəkarlığı daha da dərinləşdirməyə, yeniləşdirməyə və daim axtarışda olmağa meyilli olur; Səriştəli müəllimlər təkcə bu gün üçün deyil, gələcək üçün çalışan, planlaşdırdığı işlərin nəticələrini əvvəlcədən görə bilən, hər işdə gələcəyi düşünən, şagirdlərə və pedaqoji prosesə nikbin yanaşan, onların problemlərinə laqeyd qalmayan və uşaqlara öz övladları kimi münasibət bəsləyən müəllimlərdir; Yüksək pedaqoji mədəniyyətə malik olmaq. Belə müəllimlər özünün peşəkarlığı ilə seçilir və bu, peşəkar pedaqoji mədəniyyət kimi müəllimi zənginləşdirir, onun peşəkarlığının və səriştəliliyinin əsl meyarına çevrilir. Peşəkar və səriştəli müəllim dərs dediyi şagirdlərə dəyər verir, onları şəxsiyyət kimi qəbul edir; Peşəkar müəllimin nitqi, davranışı, mimikası, pantomimikası təsirlidir, verbal və qeyri-verbal ünsiyyət tərzləri bir-birini tamamlayır. Onun keçdiyi bütün dərslər şagirdlərin beyninə sanki daş üzərində yazı kimi həkk olunur, hətta yaxşı oxumayan və ya oxuya bilməyən şagirdlər də onun dərslərinə maraqla qulaq asır, fəallıq göstər-məyə can atırlar;Peşəkar və səriştəli müəllim özünə, dediyi sözə inamlıdır,şagirdlərinə də inam göstərir. Dediyi sözlərdə, verdiyi qərarlarda özünəinam ifadə olunur. Rəğbətləndirəndə də, cəzalandıranda da obyektivdir, ədalətlidir. Cəza verildikdə uşağın özünü deyil, onun düzgün olmayan hərəkətini tənqid edir”.(2. səh.19-20.) Müəllimin peşəkarlığı və səriştəliliyi qeyd olunan tələblər baxımından formalaşması heçdə asan deyildir. Daim yeniliklər axtarışında olan, standart hallarda müəyyən yeniliklər etməyi bacaran müəllim peşəkarlığında və səriştəliliyində mühüm yer tutanlar ölkədə neçəsinə aid olduğu barədə təhsil ekspertlərinin yanaşmaları maraqlı olar. Psixoloqlar insanların əmək fəaliyyətinin beş əsas motivlərini müəyyənləşdiriblər:maddi vəsait; işin stabilliyi;həmkarlarla ünsiyyət;peşənin nüfuzlu olması; öz ixtisasını mükəmməl bilmək (peşəkarlıq). Hər bir peşə növü insan qarşısına tələblər qoyur.

Aydındır ki, məktəblilərin, təhsilalanların nəzəri biliklərə, bacarıq və vərdişlərə yiyələnməsi təlim əməyi nəticəsində reallaşdırılır. Təlim əməyi insanın fəaliyyət və davranışını bəşəriyyətin ictimai təcrübəsinin mənimsənilməsinə, təhsillənməsinə, tərbiyələnməsinə və psixoloji inkişafına yönəldən fəal bir prosesdir. İnsan fəaliyyəti sistemində əmək mühüm yer tutur.(3.səh.54) Dünyanın tanınmış mütəfəkkirləri əmək və insan arasında olan ülvi bağlılığı müdrikcəsinə ifadə etmişlər: “Əmək insanı nəcibləşdirir, onu xeyirxah edir” (Belinski). “Həyatın cövhəri yalnız əməkdir, Zəhmətsiz bir insan nəyə gərəkdir?” (Nizami). “Əmək həyat lampasına yanacaq tökür, düşüncə isə onu yandırır” (Marks). “Əmək bütün xəstəliklərin ən nəcib loğmanıdır, əməkdən fərəhli heç bir şey yoxdur” (Ostrovski). “İnsan eşitdikləri və dedikləri ilə deyil, əmək və fəaliyyəti ilə kamilləşir” (Edisson).

İnsanın şəxsiyyət kimi formalaşmasında əmək vasitəsilə tərbiyə (əmək tərbiyəsi) həmişə pedaqoji sahədə tədqiqat aparan alimlərin diqqətini cəlb etmişdir. Təsadüfi deyildir ki, pedaqogikaya dair tədqiqatlarda bu kimi məsələlərə dəfələrlə müraciət olunmuşdur. “Azərbaycanda əməyin və politexnizmin tarixinə dair oçerklər”, “Yeniyetmələrin ailədə əmək tərbiyəsi”, “Uşaq bağçalarında əmək tərbiyəsi”, “Məktəblilərin əməksevərlik tərbiyəsində xalqın əməklə bağlı mütərəqqi adət-ənənələri və fikirlərindən istifadə”, “Kənd ümumtəhsil məktəblərində şagirdlərin ictimai-faydalı və məhsuldar əməyinin səmərəli təşkili yolları” və s. bu kimi mövzularda dissertasiyaların müdafiə olunması problemin son dərəcə aktual olduğunu şərtləndirir.

İstifadə olunan ədəbiyyat

1. F. Sadıqov,A. Mövsümlü.Şərəfli alim ömrü. Bakı.”Elm və Zəka”,2021,268 səh.

2.M. İlyasov. Müəllim peşəkarlığı və pedaqoji səriştəliliyin müasir problemləri. Monoqrafiya. Bakı: “Elm və təhsil”, 2018,208 səh.

3. Əmək insanın tərbiyə olunmasında mühüm vasitədir. “Azərbaycan məktəbi” jurnalı. Bakı.№5-2014.

Tarix: 30-03-2023, 22:51

Xəbəri paylaş