Peşəkarlıq səviyyəsini yüksəltmək üçün
Sumqayıt şəhəri 6 saylı tam
orta məktəbin müəllimi
Qloballaşan dünyanın gələcəyi olan şaxsiyyətlərin yetişməsində innovativ müəllimlərin xüsusi yeri var. Təbaşir və yazı taxtasından istifadə edən ənənəvi müəllimdən fərqli olaraq müasir müəllimin əlində daha çox imkanlar var. Bu gün müəllim İKT vasitələrindən, müxtəlif təhsil portallarından, təhsil saytlarından, müxtəlif interaktiv resurslardan, elektron lövhələrdən istifadə imkanına malikdir. Sadəcə bu imkanları öz dərslərində reallaşdırmaq üçün hər müəllim öz üzərində daim işləməyə, məlumatı şagirdlərin necə qəbul etmə xüsusiyyətlərini araşdırmağa çalışmalıdır. Çünki öyrənmə prosesində hər bir şagirdin subyektivliyi, potensial imkanları, fərdi keyfiyyətlərlə seçilməsi, yaradıcılıq xüsusiyyətləri nəzərə almalıdır. Müəllim bir gündə bir neçə sinifdə dərs aparırsa, sinifdə oxuyan yaxşı və zəif uşaqların xüsusi keyfiyyətlərini bilərək, hər sinifdə fərqli dərs qurur. Yəni müəllim sinfin səviyyəsini xüsusi diqqətdə saxlayır.
Müasir təhsil sistemi müəllimlərdən metodiki hazırlıq və peşəkarlıq səviyyəsini yüksəltməyi tələb edir. Müəllim hər bir dərsə yaradıcılıq işi kimi baxmalıdır. Bilirik ki, eyni bir mövzu ayrı-ayrı müəllim tərəfindən onun bilik səviyyəsinə və şagirdlərə çatdırma metodologiyasına görə fərqlənir. Hər müəllim aparacağı dərsi öz bilik bazası və fantaziyasına, yaradıcılıq imkanlarına görə təşkil edir. Məhz bu baxımdan müəllim hazır elmi bilik verməkdən çox öz işini şagirdlərdə idraki fəallığı artırmağa, tədqiqatçılıq qabiliyyətlərini inkişaf etdirməyə yönəltməlidir. Bilirik ki, müasir təhsil sistemimiz şagirdlərin sosial varlıq kimi cəmiyyətə inteqrasiya olunmasında, onlarda təfəkkür və təxəyyülün qarşılıqlı inkişaf etdirilməsi məsələsini əsas götürür.
Biz informasiya bolluğu dövründə yaşayırıq. Bu gün həyatımızın bütün sferalarında olduğu kimi təlim prosesində də informasiya texnologiyalarından istifadə xüsusi yer tutur. Proseslərin sürətli inkişafı tələb edir ki, müəllim informasiyanın ötürülməsində şagirdləri qabaqlasın. İKT bacarığına malik olan müəllim qısa zaman ərzində elektron təqdiçatlar, tapşırıqlar, cədvəllər, slaydlar, flipçartlar vasitəsilə şagirdlərə daha çox informasiya ötürür. Lövhədə İKT-dən istifadə dərsi daha maraqlı və yaddaqalan edir, şagirdlərdə dərketmə və tədqiqat aparma proseslərini bir növ dinamik edir. Şagird göstərilən görüntünün müqabilində suallar yaranacağını bilərək öz diqqətini toplayır. Bu isə hər şagirdin bir fərd olaraq öz potensial imkanını göstərmasində, fərqlənməsində önəm daşıyır. Projektorla ekranda görünən tapşırığı şagirdlər həll edir, multimedia vasitəsilə proseslərin gedişini həm görür, həm eşidir, elektron lövhədə tapşırığa uyğun olaraq işləyir. Müstəqil çalışır, araşdırır, nəticə əldə edir, fikrini əsaslandırır və s. İKT bacarığına malik olan müəllim həm öz üzərində çalışır, keçəcəyi dərs üçün interaktiv resurslardan istifadə edir, şagirdləri cəlb edir, həvəsləndirir, onlara az vaxtda daha çox informasiya ötürür. İKT vasitəsilə dünya sanki şagirdin ovcunun içində olur.
Mən öz şəxsi təcrübəmə əsasən deyə bilərəm ki, bu cür dərslərə şagirdlərin xüsusi marağı olur. Mən neçə illərdir ki, riyaziyyat elminin sirlərini şagirdlərimə öyrədirəm. Daim öz üzərimdə çalışır və zamanın tələbinə uyğun dərslər qurmağa çalışıram.
Tarix: 7-04-2023, 09:00
Xəbəri paylaş