Saytda axtar
Bazar günü  
 12 fevral 2017   23:10:34  

Təhsil Nazirliyinin layihəsi YUNESKO-nun onlayn platformaları arasında




 

Azərbaycanda tətbiq edilən təhsil platforması YUNESKO-nun rəsmi saytında təqdim edilən siyahıda yer alıb. Belə ki, dünyada COVID-19 koronavirus pandemiyasının yayılması ilə əlaqədar YUNESKO-nun rəsmi saytında (https://en.unesco.org/covid19/educationresponse/solutions) şagirdlərin öyrənmə prosesini asanlaşdırmaq məqsədilə distant təhsil platformaları, elektron portallar və təlim tətbiqetmələrinin siyahısı təqdim edilib. Ölkəmizdə tətbiq edilən hesablama təfəkkürü və riyazi bacarıqların inkişafına xidmət edən  “Polyup” platforması da bu siyahıya daxil edilib. 

2015-ci ildə Stanford Universitetinin professorları tərəfindən təsis olunmuş “Polyup” platforması real həyatda problemlərin səmərəli üsullarla həllinə yönəlmiş ödənişsiz və hər kəsə açıq olan oyun tipli təhsil platformasıdır. Platforma hazırda 70-dən çox ölkədə istifadə edilir (ABŞ, Oman, Yunanıstan, Böyük Britaniya Krallığı, Azərbaycan, İspaniya, Fələstin və s.) və Azərbaycan dili də daxil olmaqla 26 dildə fəaliyyət göstərir. 

2018-ci ilin dekabr ayından etibarən Azərbaycanda 90 məktəbdən ümumilikdə 1000-dən çox müəllim və 10 000 şagird “Polyup” layihəsinə qoşularaq fəal şəkildə respublika üzrə keçirilən müsabiqələrdə iştirak edirlər. 2019-cu ilin fevral ayından başlayaraq Azərbaycan üzrə 10 “Poly” müsabiqə həyata keçirilib. Müsabiqələrdə qalib gələn müəllim və şagirdlər müxtəlif qiymətli hədiyyə və sertifikatlarla təltif olunublar. Bundan əlavə, müəllim və şagirdlərin portal vasitəsilə beynəlxalq müsabiqələrdə iştirak imkanları da mövcuddur. 

Qeyd edək ki, hazırda Təhsil Nazirliyi “Polyup” platformasındakı resursları teledərslərə və www.video.edu.az portalında yerləşən digər videoresurslara da inteqrasiya edir. Nəticədə şagirdlər dərs mövzuları üzrə virtual olaraq genişləndirilmiş reallıqda obyektləri dəyişərək riyaziyyat və kompüter elminin onların həyatına təsirini əyani şəkildə anlayırlar. Ölkəmizdə tətbiq olunan bu təcrübədən artıq digər ölkələrdə də faydalanırlar.


Tarix: 16-04-2020, 13:53

Xəbəri paylaş