İngiltərədə məktəblərdə şəkərli və qızardılmış qidalar qadağan edilir

İngiltərədə uşaqların piylənməsi ilə mübarizə çərçivəsində məktəb menyularında yüksəkşəkərli və yağda qızardılmış qidaların təqdim olunması məhdudlaşdırılacaq.
AZƏRTAC xəbər verir ki, hökumətin açıqladığı yeni planlara əsasən, doqquz həftəlik ictimai müzakirədən sonra məktəblərdə sosiska rulonları və pizza kimi qidaların hər gün verilməsi qadağan ediləcək, desertlərin miqdarı azaldılacaq və qızardılmış yeməklər menyudan çıxarılacaq. Bunun əvəzində məktəblər daha çox lif tərkibli tam taxıllı məhsullar, məsələn, tam buğda çörəyi, qəhvəyi makaron və düyü təqdim etməli olacaq. Həmçinin hər əsas yeməklə birlikdə tərəvəz və ya salat verilməsi məcburi olacaq.
Qeyd edək ki, İngiltərədə hazırda hər üç uşaqdan biri ibtidai məktəbi artıq çəki və ya piylənmə ilə tərk edir. Yüksəkşəkərli qidalanma nəticəsində yaranan diş çürüməsi isə 5–9 yaşlı uşaqlar arasında xəstəxanaya müraciətlərin əsas səbəbi hesab olunur.
Qaydaların icrasını təmin etmək üçün hökumət məktəblərin bu tələblərə əməl etməsini izləyəcək yeni milli nəzarət sistemi üzərində də işləyir. Bu sistemin 2027-ci ilin sentyabrından qüvvəyə minməsi gözlənilir. Orta məktəblərə isə dəyişiklikləri tətbiq etmək üçün əlavə bir il vaxt veriləcək.