Bu gün Su çərşənbəsidir

Bu gün Azərbaycanda xalq təqvimində baharın gəlişini simvolizə edən dörd çərşənbədən birincisi Su çərşənbəsidir.

Xalq arasında “Əvvəl çərşənbə”, “Gözəl çərşənbə” və ya “Sular Novruzu” kimi tanınan bu gün, təbiətin buzunun əridiyi, suların təzələndiyi anın rəmzidir.

Qədim mifoloji təsəvvürlərə görə, dünya dörd ünsürdən yaranıb və onlardan birincisi məhz sudur. Su çərşənbəsi dirilik, paklıq və təmizlənmə rəmzi hesab olunur. İnanclara görə, məhz bu gün sular hərəkətə gəlir və təbiət öz oyanış dövrünə qədəm qoyur.

Etnofrafların bildirdiyinə görə, sabah sübh tezdən yerinə yetirilən bir sıra ayinlər insanın ilboyu sağlam və ruzili qalacağına işarədir:

• Təzə su ayini: Gün doğmamış axar suyun üstünə getmək və əl-üzü yumaq paklanma əlamətidir.

• Xeyir-dua: İnsanlar bir-birinə su çiləyərək yeni ilin xeyirli olmasını arzulayırlar.

• Mənfi enerjidən azad olma: Pis yuxuların suya danışılması ilə mənfi enerjinin yox olduğuna inanılır.

• Bərəkət rəmzi: Süfrədə suyun daşması bolluq və ruzi əlaməti kimi yozulur.

• Tonqal ritualı: Həyətlərdə ilk bayram tonqalları qalanır, mənəvi yenilənmə qeyd edilir.

 İlk çərşənbəniz mübarək! Qəlbiniz su kimi aydın, süfrəniz bərəkətli olsun!