Neft və Sənaye Universitetində Ümummilli Lider Heydər Əliyevin anım gününə həsr olunmuş tədbir keçirilib
Dekabrın 11-də Azərbaycan Dövlət Neft və Sənaye Universitetində (ADNSU) Ümummilli Lider Heydər Əliyevin anım gününə həsr olunmuş tədbir keçirilib.
Tədbir iştirakçıları əvvəlcə Ulu Öndərin büstü önünə əklil qoyub, xatirəsini ehtiramla yad ediblər.
Bu barədə AZƏRTAC-a ADNSU-dan məlumat verilib.
Azərbaycan Respublikasının Dövlət Himninin səsləndirilməsi ilə başlayan tədbirdə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib. Sonra Ulu Öndərin 100 illiyinə həsr olunmuş film nümayiş olunub.
Tədbirdə çıxış edən ADNSU-nun rektor əvəzi dosent Vazeh Əskərov Ulu Öndər Heydər Əliyevin Azərbaycan xalqı qarşısında misilsiz xidmətlərindən söz açıb. Azərbaycanın məhz Ulu Öndərin uzaqgörən siyasəti sayəsində müstəqillik qazandığını, parçalanmaqdan və xaosdan xilas olduğunu qeyd edən dosent Vazeh Əskərov Heydər Əliyevin siyasi kursunun layiqli davamçısı Prezident İlham Əliyevin sayəsində bu müstəqilliyin qorunub saxlanıldığını, müasir Azərbaycan dövlətinin ildən-ilə inkişaf etdiyini və torpaqlarımızın işğaldan azad olunduğunu vurğulayıb.
Tədbirdə, həmçinin Humanitar fənlər kafedrasının dosenti Yaşar Əhmədov, Neft-mexanika fakültəsinin tələbəsi Sənan Hüseynov çıxış ediblər.
Çıxışlarda dahi şəxsiyyət, görkəmli siyasi xadim Heydər Əliyevin Azərbaycan dövləti və xalqı qarşısında gördüyü böyük işlərdən danışılıb. Ulu Öndərin əvəzsiz xidmətlərinin Azərbaycan xalqı tərəfindən daim uca tutulacağı bildirilib.
Tarix: 12-12-2024, 13:45