Elitar Gimnaziyada “Atatürkü Anma, Gənclik və İdman Bayramı” Günü qeyd olunub

       

Azərbaycan gənclərinin gələcəyi məktəblərdə verilən tədrislə bərabər, onların  fərdi qabiliyyətlərinin inkişaf etdirilməsi üçün həyata keçirilən layihələrdən asılıdır. Elm və Təhsil Nazirliyinin təşəbbüsü, iştirakı və təşkilatçılığı ilə həyata keçirilən layihələr bu sahədə ciddi əhəmiyyət kəsb edir.  
         “Bakı-2019”   Avropa Gənclər Olimpiya Festivalı çərçivəsində  start verilən   OCEP - Olimpiya Mədəniyyəti  və Təhsil Proqramı Beynəlxalq Olimpiya Komitəsinin Olimpiya Həmrəyliyi  Fondu və Avropa Olimpiya Komitəsinin dəstəyi  və  Azərbaycan Respublikası Elm və Təhsil Nazirliyinin tərəfdaşlığı ilə Milli Olimpiya Komitəsi tərəfindən həyata keçirilir.
 
         2022-ci ildən OCEP layihəsində qardaş Türkiyəni təmsil edən Elitar gimnaziya Azərbaycan - Türkiyə dostluğuna daim sadıq qalan, bu dostluğu daim möhkəmləndirməyə çalışan  təhsil müəssisələrindən biridir.

        Bu günlərdə İlyas Əfəndiyev adına  Elitar gimnaziyada  OCEP   layihəsi çərçıvəsində  19 May  - Atatürkü Anma,  Gənclik və İdman Bayramı Günü  münasibətilə tədbir keçirilmişdir. 

     Azərbaycan Respublikası Elm və Təhsil Nazirliyinin sektor müdiri Fuad  Qarayev, Türkiyə Cümhuriyyətinin təhsil müşaviri Nurullah Feyzi Yazıçı, Nəsimi Rayon İcra Hakimiyyətinin başçısı Asif Əsgərov, birincı müavini Gülarə Verdiyeva,  Milli Olimpiya Komitəsinin beynəlxalq proqramlar şöbəsinin müdiri Mehman Kərimov, komitənin əməkdaşı Ruslan Məmmədov, Milli Qəhrəman Polad Həşimovun həyat yoldaşı Ofeliya Həşimova, “Qubadlı fatehi”  Vidadi  Xəlilovun həyat yoldaşı Nərmin Xəlilova tədbirin qonağı olublar.
    Tədbirdə Elitar gimnaziyanın şagirdlərinin nitqində xalqımızın Ümummilli  lideri Heydər  Əliyevin, Ulu Öndər Mustafa Kamal Atatürkün, Prezidentimiz - Ali Baş Komandan İlham Əliyevin sitatları - müdrik kəlamları dinlənildi. Azərbaycan – Türkiyə dostluğundan bəhs edən videoçarx nümayış etdirildı. 

    Gimnaziyanın balaca balalarının hazırladığı “Zaybek” və “Ay-ulduz” rəqsi qonaqlar tərəfindən alqışlarla qarşılandı və 10-A sinif şagirdinin ağır atletika üzrə idmançı Naim Süleymanoğlunu təsvir edən çıxışı maraqlı oldu.

  OCEP layihəsi çərçivəsində müxtəlif tədbirlərdə iştirak edib uğur qazanmış şagirdlər qonaqlara təqdim olundu.
  Tədbir boyu duyğulu anlar yaşayan qonaqlar çıxış edərək  şagirdləri təbrik edib gələcək layihələrdə uğurlar arzu etdilər.