BDU-da ZnO nanokompozitlərin sintezi tədqiq olunub

 
Bakı Dövlət Universitetinin (BDU) Tədqiqat, İnkişaf və İnnovasiyalar üzrə Mükəmməllik Mərkəzinin Nanoaraşdırmalar elmi-tədqiqat laboratoriyasında növbəti elmi seminar keçirilib. Seminarda laboratoriyanın böyük elmi işçisi Sevinc Nuriyeva “PP/ZnO nanokompozitləri: Sintezi, quruluşu və xassələri” mövzusunda məruzə edib.  Məruzəçi ZnO (sink oksid) nanohissəcikləri əsasında polimer kompozitlərin sintezi, alınmış materialların quruluş və xassələrinə nanohissəciklərin təsiri barədə məlumat verib. O qeyd edib ki, tədqiqatlar nəticəsində nanodoldurucunun miqdarından asılı olaraq kompozit materialların kristallik quruluşu, lüminessent və dielektrik xassələrinin yaxşılaşması müəyyən edilib. Bu tip materiallar alternativ günəş mənbələri, elektrokimyəvi sensorlar və eləcə də superkondensatorlarda geniş tətbiq imkanlarına malikdir.