Yeni kitab: "Təhsil müəssisələrində innovasiyaların tətbiqi sistemi"
“Müəllim” nəşriyyatı tərəfindən Nəzakət İmamverdiyeva, Vaqif Mahmudov, Elçin Salmanov, Adil Həsənov və Şahin Məmmədlinin həmmüəllifliyi ilə "Təhsil müəssisələrində innovasiyaların tətbiqi sistemi" adlı yeni metodik vəsait nəşr olunmuşdur (Bakı: Müəllim, 2026).
Bakı Dövlət Universitetinin “Sosial elmlər və psixologiya” fakültəsinin 19 mart 2026-cı il tarixli Elmi Şura iclasının (protokol № 4) qərarı ilə nəşr edilən bu dəyərli vəsaitin elmi redaktoru professor Hikmət Əlizadə, rəyçiləri professorlar Ləzifə Qasımova və Akif Abbasov, dosent Rasim Şükürovdur.
Müasir dövrdə təhsil sisteminin inkişafı innovativ yanaşmaların tətbiqi ilə sıx bağlıdır. Təhsil müəssisələrinin rəqabətqabiliyyətliliyinin artırılması, təlim-tərbiyə prosesinin keyfiyyətinin yüksəldilməsi və insan kapitalının formalaşdırılması innovasiyaların səmərəli idarə olunmasını zəruri edir. “Təhsil müəssisələrində innovasiyaların tətbiqi sistemi” adlı kitabda təhsil sahəsində innovasiya fəaliyyətinin nəzəri, metodoloji və praktik əsasları geniş şəkildə araşdırılmışdır.
Vəsaitdə innovasiya anlayışının mahiyyəti, onun təhsil sistemində rolu və əhəmiyyəti izah edilir, təhsil müəssisələrinin innovativ inkişafının əsas istiqamətləri müəyyənləşdirilir. Həmmüəlliflər innovasiyaların yaranması, planlaşdırılması, tətbiqi və qiymətləndirilməsi mərhələlərini sistemli şəkildə təhlil edərək onların idarə olunması mexanizmlərini təqdim edir. Eyni zamanda təhsil menecmentində innovativ yanaşmaların tətbiqi, strateji planlaşdırma, liderlik və dəyişikliklərin idarə olunması məsələləri ətraflı şərh olunur.
Əsərdə innovasiya layihələrinin hazırlanması və həyata keçirilməsi prinsipləri, innovasiya komandasının formalaşdırılması, innovativ mühitin yaradılması və pedaqoji kollektivin dəyişikliklərə hazırlanması məsələləri xüsusi yer tutur. Müasir informasiya-kommunikasiya texnologiyalarının tədris prosesinə inteqrasiyası, rəqəmsal təhsil mühitinin qurulması, elektron resurslardan istifadə imkanları və distant təhsilin təşkili ilə bağlı aktual məsələlər də geniş şəkildə işıqlandırılır.
Kitabın mühüm cəhətlərindən biri innovasiyaların tətbiqi zamanı yaranan problemlərin və risklərin təhlil edilməsidir. Müəllif innovasiya fəaliyyətinə mane olan amilləri müəyyənləşdirir, onların aradan qaldırılması yollarını göstərir və təhsil müəssisələrində davamlı inkişafın təmin olunması üçün praktik tövsiyələr verir. Həmçinin innovasiyaların səmərəliliyinin qiymətləndirilməsi meyarları və monitorinq mexanizmləri təqdim olunur.
Metodik vəsaitdə yer alan nəzəri müddəalar praktik nümunələr, sxemlər, cədvəllər və metodik tövsiyələrlə zənginləşdirilmişdir. Bu isə kitabın elmi-nəzəri əhəmiyyətini artırmaqla yanaşı, onun praktik istifadə imkanlarını da genişləndirir.
Kitabın sonunda mövzularla bağlı kifayət qədər testlər və onların cavabları öz əksini tapmışdır.
Nəticə etibarilə, “Təhsil müəssisələrində innovasiyaların tətbiqi sistemi” kitabı təhsil sahəsində çalışan rəhbər və pedaqoji işçilər, magistrantlar, doktorantlar, təhsil menecerləri və innovasiya fəaliyyəti ilə maraqlanan tədqiqatçılar üçün dəyərli elmi-metodik mənbədir. Əsər təhsil müəssisələrinin innovativ inkişafının təmin edilməsi, idarəetmə sisteminin təkmilləşdirilməsi və müasir təhsil mühitinin formalaşdırılması istiqamətində mühüm töhfə verir.
Tarix: Dünən, 14:45
Xəbəri paylaş