TƏHSİL VƏ PSİXOLOGİYANIN VƏHDƏTİNDƏ FORMALAŞAN BİR PEŞƏ YOLU
GÜLNAR HÜMBƏTOVA,
N. Apayev adına Qəbələ şəhər 4 nömrəli tam orta məktəbin
ingilis dili müəllimi
Uzun illər ərzində ingilis dili müəllimi kimi fəaliyyət göstərdiyim məktəb mühiti mənim üçün təkcə peşəkar fəaliyyət sahəsi deyil, eyni zamanda insanı və insan psixologiyasını dərindən dərk etdiyim bir həyat məktəbi olub.
Bu illər ərzində aydın şəkildə dərk etdiyim əsas həqiqət ondan ibarətdir ki, müəllim yalnız bilik ötürən şəxs deyil; o, şagirdin düşüncə tərzinə, dünyagörüşünə, emosional vəziyyətinə və şəxsiyyət kimi formalaşmasına bilavasitə təsir göstərən aparıcı fiqurdur. Sinif mühitində apardığım müşahidələr, şagirdlərin fərdi xüsusiyyətləri ilə işləmək təcrübəsi mənim insan psixologiyasına olan marağımı daha da dərinləşdirmiş və bu maraq zaman keçdikcə məqsədli, şüurlu bir inkişaf yoluna çevrilmişdir.
Məhz bu səbəbdən gələcək fəaliyyətimi psixologiya sahəsi üzrə mütəxəssis kimi davam etdirmək qərarına gəlmişəm. İnanıram ki, təhsil və psixologiyanın vəhdəti müasir təhsilin əsas tələblərindən biridir.
Şagirdlərin yalnız akademik biliklərə yiyələnməsi deyil, eyni zamanda onların emosional tarazlığının qorunması, özünəinam hissinin formalaşması, stressə davamlı və sağlam düşüncəli şəxsiyyət kimi yetişməsi təhsil prosesinin ayrılmaz hissəsinə çevrilməlidir. Müasir dövrdə müəllimin psixoloji biliklərə malik olması təhsilin keyfiyyətini yüksəldən, şagird-müəllim münasibətlərini sağlam əsaslar üzərində quran əsas amillərdəndir.
Bu inkişaf yolunda ölkəmizdə təhsil və səhiyyə sahəsində həyata keçirilən ardıcıl, məqsədyönlü və sistemli dövlət siyasətinin rolu xüsusilə vurğulanmalıdır. Azərbaycan Respublikasının Prezidenti cənab İlham Əliyevin uzaqgörən və strateji baxışları, Birinci Vitse-prezident Mehriban Əliyevanın humanizmə, insan amilinə və sosial rifaha əsaslanan təşəbbüsləri, eləcə də Elm və Təhsil naziri Emin Əmrullayevin müasir çağırışlara cavab verən təhsil islahatları müəllim və psixoloq kadrlarının peşəkar inkişafı üçün geniş və davamlı imkanlar yaradır. Bu siyasət insan kapitalının inkişafını prioritet elan edərək, cəmiyyətin intellektual və mənəvi potensialının gücləndirilməsinə xidmət edir.
Aparılan islahatların əsas mahiyyəti savadlı, sağlam düşüncəli, milli-mənəvi dəyərlərə bağlı və rəqabətqabiliyyətli cəmiyyətin formalaşdırılmasına yönəlmişdir. Mən də bu dövlət xəttini dəstəkləyərək biliklərimi daim artırmağı, öz üzərimdə sistemli şəkildə işləməyi və qazandığım təcrübə ilə ölkəmizin gələcəyi naminə faydalı bir mütəxəssis olmağı qarşıma əsas məqsəd kimi qoymuşam.
Dərin inamla düşünürəm ki, təhsil və psixologiyanın paralel və qarşılıqlı inkişafı gələcək nəsillərin daha sağlam, düşünən, məsuliyyətli və vətəninə bağlı fərdlər kimi yetişməsində mühüm rol oynayacaq. Bu yolda atılan hər bir addım təkcə şəxsi peşəkar inkişafımın deyil, eyni zamanda cəmiyyətimizin tərəqqisinə töhfə vermək istəyimin ifadəsidir.
Tarix: Bu gün, 15:29
Xəbəri paylaş