HEYDƏR ƏLİYEV QƏLBİMİZDƏ ƏBƏDİ YAŞAYIR

 
     Qəlbi Azərbaycanla döyünən hər kəs Ulu Öndəri sonsuz sayğı və hörmətlə anır. Mən də bir müəllim kimi pedaqoji fəaliyyətimdə Heydər Əliyev ideyalarının, onun mənəvi irsini təbliğ etmiş, dahi rəhbərin təhsil işçilərinə olan tövsiyələrindən bəhrələnmişəm.
 
     Heydər Əliyev hansı vəzifədə olmasından, hansı şəraitdə işləməsindən asılı olmayaraq, ona münasibətin vahid ünvanı və məzmunu Ümumxalq məhəbbəti olmuşdur. O, 1969-cu ildə hakimiyyətə gəldiyi andan etibarən respublikamızın  həyatında qısa müddət ərzində bütün istiqamətlərdə nailiyyətlər əldə olunmuş, milli-mənəvi dəyərlərin dirçəlişi yolunda mühüm addımlar atılmışdır. 

     Heydər Əliyevin idarəetmə fəlsəfəsinin başlıca istiqamətini milli özünüdərkin güclənməsinə şərait yaradan sürətli  inkişaf strategiyası  təşkil etmişdir. Beynəlxalq normalara əsaslanan demokratik, hüquqi dövlət quruculuğu, suveren Azərbaycan Respublikası Konstitusiyasının qəbul edilməsi, vətəndaş cəmiyyətinin formalaşdırılması, yeni iqtisadi kursun müəyyən edilməsi kimi vacib məsələlərin həlli şəxsən Ümummilli Lider Heydər Əliyevin xidmətləridir.

     İdarəçilik istedadı, tükənməz enerjisi, işgüzarlığı və yüksək peşəkarlığı  ilə səciyyələnən  Heydər Əliyev fenomeni düşüncə və fikir  cəsarətinə, sərbəst qərar qəbuletmə qabiliyyətinə görə dünyanın ən nüfuzlu siyasi xadimlərindən biri kimi tanınır, sevilir, öyrənilir və tədqiq edilir. Heydər Əliyev ideyalarının gerçəkləşməsinin parlaq təcəssümü müstəqil Azərbaycan Respublikasıdır. Dövlətçiliyimizin Heydər Əliyev tərəfindən formalaşdırılan  mənəvi-ideolojı əsası azərbaycançılıq məfkurəsinin şüurlara hakim kəsilməsi, milli-mənəvi dəyərlərimizin  dövlətçilik ənənələrinə, strateji  hədəflərə yönəldilməsi ilə nəticələnib. Azərbaycan dövlətçiliyinin və xalqının taleyində yeni sabahlara açılan tarixi yolun əsaslı dönüş mərhələsinin həlledici  məqamları  dəmir iradə, obyektiv  prinsipiallıq, səmimiyyət, həssaslıq və müdriklikdən qaynaqlanan  bu böyük şəxsiyyətə bağlıdır. Bu bağlılıq ənənəvi olaraq bu gün də uğurla davam etdirilir.


   Heydər Əliyevin xüsusi  diqqət   və qayğısının nəticəsidir ki, hazırda elmin inkişafı, təhsilin  tərəqqisi, əhalinin sağlamlığı, milli-mənəvi dəyərlərin qorunub saxlanılması və  təbliği  sahəsində çoxsaylı Dövlət proqramları, regional inkişaf proqramları, xüsusi  tədbirlər planı və konsepsiyalar  yerinə yetirilməkdədir.
    Bir müəllim kimi Azərbaycanla qürur duyur, ona layiq vətəndaşlar yetişdirməyə, Ulu Öndər Heydər Əliyevin vəsiyyətlərini həyata keçirməyə çalışıram. 
 

---

Tarix: 10-05-2023, 19:08

---