Saytda axtar
Bazar günü  
 12 fevral 2017   23:10:34  

“Təhsil həyatları dəyişir”

 

24 yanvar bütün dünyada Beynəlxalq Təhsil Günü kimi qeyd olunur. BMT-nin baş katibi Antonio Quterreş Beynəlxalq Təhsil Günü ilə bağlı dünya ictimaiy­yətinə müraciət edib.
Müraciətdə bu il ilk dəfə olaraq Beynəlxalq Təhsil Gününün qeyd edildiyi diqqətə çatdırılıb. Antonio Quterreş deyib: “Təhsil həyatları dəyişir. BMT-nin Sülh elçisi Malala Yusufzayın da dediyi kimi: “bir şagird, bir müəllim, bir kitab və bir qələm dünyanı dəyişə bilər”. Nelson Mandela da haqlı olaraq təhsili “dünyanı dəyişmək üçün istifadə edəcəyimiz ən güclü silah” adlandırıb.
BMT-dəki fəaliyyətimdən və öz ölkəmdə dövlət rəsmisi kimi çalışdığım zamanlardan da əvvəl mən müəllim olmuşam. Lissabonun kasıb məhəllələrində təhsilin yoxsulluğu aradan qaldırmaq üçün vasitə, sülh və əmin-amanlığı qorumaq üçün dəstək olduğunu gördüm.
Bu gün təhsil Dayanıqlı İnkişaf Məqsədlərinin mərkəzində dayanır. Bərabərsizliklərin azaldılması və səhiyyənin inkişafı üçün təhsilə ehtiyacımız var. Gender bərabərliyinə nail olmaq və uşaq nikahlarını aradan qaldırmaq üçün təhsilə ehtiyacımız var. Planetimizin sərvətlərini qorumaq üçün təhsilə ehtiyacımız var. Nifrət nitqi, ksenofobiya və dözümsüzlüyə qarşı vuruşmaq və qlobal vətandaşlıq anlayışını inkişaf etdirmək üçün təhsilə ehtiyac duyuruq. Əksəriyyəti qız olmaqla hələ də ən azı 262 milyon uşaq, yeniyetmə və gənc məktəbə getmir. Məktəbə gedən daha milyonlarla insan isə ibtidai biliklərə sahib deyil. Bu, onların təhsil hüququnun pozuntusudur. Dünya XXI əsr iqtisadiy­yatında rəqabətədavamlı bacarıq­ları olmayan uşaq və gənclərdən ibarət nəsli özünə rəva görə bilməz. Eləcə də biz bəşəriyyətin yarısının təhsildən kənar qalmasına yol verə bilmərik”.
Müraciətdə qeyd olunur ki, Dayanıqlı İnkişaf Məqsədlərinin 4-cü bəndində nəzərdə tutulan hər kəs üçün inklüziv və bərabər keyfiyyətli təhsilin təmini və ömürboyu öyrənmə imkanlar naminə daha çox çalışmaq lazımdır. Təhsil, həmçinin nəsillərarası yoxsulluq fərqini aradan qaldıra bilər. Tədqiqatlar göstərir ki, bütün qız və oğlanlar orta təhsili tamamlasa, 420 milyon insan yoxsulluqdan qurtula bilər.
“Gəlin, təhsili ortaq faydamız kimi prioritetləşdirək. Onu, əməkdaşlıq, tərəfdaşlıq və maliyyələşdirmə yolu ilə dəstəkləyək və qəbul edək ki, heç kəsi kənarda qoymamaq məqsədinə nail olmaq üçün təhsildən başlamalıyıq”, - deyə Antonio Quterreş müraciətin sonunda bildirib.
***
YUNESKO-nun baş direktoru Odri Azule də 24 yanvar - Beynəlxalq Təhsil Günü ilə əlaqədar ictimaiyyətə müraciət edib. Müraciətdə ötən ilin dekabr ayında BMT Baş Assambleyasının Beynəlxalq Təhsil Gününün təsis edilməsi ilə bağlı qərar qəbul etdiyi bildirilir. BMT-nin qərarına görə, dünyada ilk dəfə qeyd edilən Beynəlxalq Təhsil Günündə təşkilata üzv dövlətlər təhsilin inklüziv keyfiyyətinə diqqəti artırmalı, bu sahədə əlavə tədbirlər görməlidirlər.
YUNESKO-nun baş direktorunun müraciətində qeyd olunur ki, bu mühüm qərar 2030-cu ilədək dayanıqlı inkişaf sahəsində Gündəliyin əhəmiyyətini vurğulayır. Bütün dövlətlərdə hərtərəfli, ədalətli və keyfiyyətli təhsili təmin etmədən, ömürboyu təhsil almaq imkanlarını yaratmadan yoxsulluğu aradan qaldırmaq mümkün olmayacaq. İqlim dəyişikliklərinin təsirini yumşaltmaq, texnoloji inqilaba uyğunlaşmaq işində uğur qazanmaq üçün ümumi təhsili təmin etmək üzrə cəsur siyasi öhdəliklər götürmək vacib məsələdir.
Beynəlxalq Təhsil Gününün qeyd edilməsi YUNESKO-nun təhsil məsələlərinə sadiqliyini bir daha təsdiq etmək üçün əlverişli imkandır.
  Hazırda dünyada 262 milyon uşaq, yeniyetmə oğlan və qızlar məktəbə getmir, 617 milyon uşaq və yeniyetmə oxumağı və adi hesabı bacarmır. Təxminən 4 milyon qaçqın uşağın məktəbə getmək imkanı yoxdur. Qarşıdurmalar və itkilər onların adi həyat tərzini pozub. Bu problemlərin həlli üçün ölkələr birgə səy göstərməlidir.


Tarix: 14-02-2019, 12:20

Xəbəri paylaş